ഒരു മിഴി പാകി ഞാന്‍
തെളിവിന്റെ തീരത്തി-
ലെരിയും മനസിന്റെ
കനലടക്കാന്‍.
ഒരു തണുവേന്തി ഞാന്‍
ഉഷ്ണ മേഘങ്ങളില്‍
ഉരുകും സരസ്സിന്റെ
തനുവുണര്‍ത്താന്‍.
ഇവിടെയൊരു കുരുക്ഷേത്ര-
യുദ്ധം തുളയിട്ട
കര്‍മ്മബന്ധങ്ങള്‍ തന്‍
പൊഴികളാണേറെയും.
ഇവിടെയൊരു ഗാന്ധാര-
പുത്രിതന്‍ കാണാകണ്ണിന്‍
തിരയാട്ടമേല്പിച്ച
ശാപ പ്പെരുക്കങ്ങള്‍.
പാപ പങ്കിലത്തിറ
തുള്ളും കാണ്ഡങ്ങളില്‍
ഉടല്‍ വെന്ത സീതായന-
ത്തിരകളലറുന്നു.
പൊയ്മുഖപ്പൂക്കളില്‍
മധു തേടിയുഴറുന്നു
വര്‍ണ്ണപ്പറവതന്‍
പശിതുള്ളുമുടലുകള്‍.
കനവില്ല!കനിവില്ല!
കരളിന്‍ തടങ്ങളില്‍
ഇരുള്‍ക്കരമുയരുന്നു
മൃദുകണമൂറ്റുവാന്‍.
ഇവിടെ പുലരുന്ന-
തിരുളിന്‍ തേര്‍ വാഴ്ചകള്‍!
കറുത്ത കിനാവുകള്‍!
കിളുന്നു മേനിതന്‍
കൊടിയ നിശ്വാസങ്ങള്‍!
ഇരുളിന്‍ തിടമ്പേറി-
യണിനിരക്കയായ്
കറുപ്പിന്‍ രഥോല്‍സവ-
ക്കാഴ്ചകള്‍.......
No comments:
Post a Comment